ޕްރޮސިކިއުޓަރ ޖެނެރަލްކަމުގެ މަޤާމުން އަޅުގަނޑު އިސްތިއުފާދިނީ 22 އޮގަސްޓު 2024 ދުވަހުގެ ރެއެވެ. އެދުވަހާއި އެދުވަހުގެ ފަހުން، ޢާންމުންގެ ތެރެއިން ވަރަށް ގިނަ މީހުންނާއި، ޕީޖީ އޮފީހުގެ މުވައްޒަފުންނާއި، އަޅުގަނޑާއެކު އެކި ދުވަސްވަރު މަސައްކަތްކުރެއްވި އެކި މުއައްސަސާތަކުގެ ވެރިންނާއި މުވައްޒަފުންނާއި، ޝަރްޢީ ކޯޓުތަކުގެ ފަނޑިޔާރުންނާއި، މުވައްޒަފުންނާއި، ފުލުހުންގެ ވެރިންނާއި އިންވެސްޓިގޭޓަރުންގެ ފަރާތުން ޝުކުރުގެ ގިނަ މެސެޖުތަކެއް ލިބުނެވެ.

އަޅުގަނޑާ މަތިކުރި މަސްއޫލިއްޔަތުތައް ދުނިޔޭގެ ފެންވަރުގައި ކުރެވިފައި އެވަނީ، މިދެންނެވި ހުރިހާ ބޭފުޅުންގެ ފަރާތުން ލިބުނު އެހީތެރިކަމާއި އެއްބާރުލުމުގެ ސަބަބުންނެވެ. މި އެންމެ ބޭފުޅުންނަށް އަޅުގަނޑުގެ ހިތުގައި އޮތީ ހިފެހެއްޓުމެއްނެތް ޝުކުރާއި ލޯތްބެވެ. ވަކިން ޚާއްޞަ ގޮތެއްގައި، ޕީޖީ އޮފީހުގެ މުވައްޒަފުންގެ ފަރާތުން އަޅުގަނޑާމެދު އޮތް ލޯތްބަކީ ދުވަހަކުވެސް ހިތުން ފިލައިގެން ނުދާނޭ ކަމެކެވެ.

މުވައްޒަފުންނަށް ދިމާވި ކަންކަމުގައި އަޅުގަނޑުގެ ފަރާތުން ދެވެން އޮތް އެހީތެރިކަމަކާއި އެއްބާރުލުމެއް އަޅުގަނޑު ދެވޭތޯ ބެލީމެވެ. ކިޔެވުމުގެ ފުރުޞަތުތަކާއި، އެނޫންވެސް ތަފާތު އެހީތެރިކަން ހޯދައިދީގެން، ދުނިޔޭގެ ފެންވަރުގައި މަސައްކަތްކުރާ މުއައްސަސާއެއް އުފެއްދޭތޯ ބެލީމެވެ. ރިސޯޓަކުންދޭ ފެންވަރުގެ ޚިދުމަތެއް، ދައުލަތުގެ އިދާރާއަކުން ދޭ އެންމެ ފުރަތަމަ މުއައްސަސާއަށް ހެދީމެވެ. 10 މިނިޓުން ކުށުގެ ރެކޯޑު ސާފުކުރެވޭގޮތް ހެދީމެވެ. ޢާންމުންގެ ފޯނުކޯލެއް މިސްނުވެ، ޖަވާބުދޭތާ 2 އަހަރުވިއެވެ. ޕީޖީ އޮފީހުގެ ހުރިހާ ޚިދުމަތެއް އޮންލައިންކޮށް ދެވޭގޮތް ހެދީމެވެ. މަސައްކަތުގެ ތަފާސްހިސާބު، އަބަދުމެ ބެލޭގޮތް ހެދީމެވެ. ނޫސްވެރިންނަށް ފަސޭހައިން މަޢުލޫމާތުލިބޭ، ދުނިޔޭގެ ފެންވަރުގެ ނިޒާމުތަކެއް އުފެއްދީމެވެ. ނަމަވެސް، މިއިން އެއްވެސް ކަމެއް އަޅުގަނޑެއް ނުކުރަމެވެ. އެކަން ކުރީ، ޕީޖީ އޮފީހުގެ މުވައްޒަފުންނެވެ. އެކަމުގެ ތަޢުރީފާއި ޝުކުރު ޙައްޤުވަނީ އެ މުވައްޒަފުންނަށެވެ.

އަޅުގަނޑު މަޤާމުން އިސްތިއުފާދިން ފަހުން، ދާދި މިދާކަށް ދުވަހަކު މީހަކު ގުޅާފައި އަހައިފިއެވެ. އަދިވެސް، ޕީޖީ އޮފީހުގެ ލިޔުންތަކުގައި ސޮއިކުރަންތޯއެވެ. އަޅުގަނޑަށްވެސް ލިބުނީ ކުއްލި ސިހުމަކާއި ހައިރާންކަމެކެވެ. ނަމަވެސް، އެކަން ވީގޮތް ފަހުން ސާފުވެއްޖެއެވެ. ޕީޖީ އޮފީހުގެ މައްސަލަތަކާބެހޭ އިދާރީ އެންމެ އިސް މީހަކަށް ހުންނަނީވެސް ޙުސައިން ޝަމީމެވެ. ބިޒްނަސް އެޑްމިނިސްޓްރޭޝަންގެ ދާއިރާއިން ކިޔަވައިގެން ހުރި، އަޅުގަނޑަށްވުރެ މާ ކުޅަދާނަ ޙުސައިން ޝަމީމެކެވެ. އިންފޮމޭޝަން ކޮމިޝަނަރުގެ އޮފީހުގެ ރެކޯޑުތަކުން ދައްކާ ގޮތުން، ރާއްޖޭގައި އެންމެ ގިނަ އާރުޓީއައި ފޯމު، އެ އޮންނަ ދުވަހަށް ޖަވާބުދާރީވާ ނިޒާމު ޕީޖީ އޮފީހުގައި އުފައްދާ ހިންގާ ޙުސައިން ޝަމީމެކެވެ. ކުށުގެ ރެކޯޑު ސާފުކުރާ ފޯމުތަކުގައި ސޮއިކުރައްވަނީ އެ ޙުސައިން ޝަމީމެވެ. ކިޔަނީ އެއް ނަމެކެވެ. ނަމަވެސް، ގާތްތިމާގެ ކަމުގެ އެއްވެސް ގުޅުމެއް ނެތެވެ.

އަޅުގަނޑު ޕީޖީކަމުގެ މަޤާމަށް ޢައްޔަންކުރި ދުވަހު މުވައްޒަފުންނާ ބައްދަލުކޮށް، އަޅުގަނޑު ދެންނެވީ އެންމެ ވާހަކައެކެވެ. އެއީ، ޕީޖީ އޮފީހަކީ، ހެނދުނު 8 ޖަހާއިރު މަސައްކަތް ފަށައި، ހުރިހާ މަސައްކަތެއް ނިންމައިގެން މެންދުރު 3 ޖަހަންވާއިރަށް މަސައްކަތް ނިމޭ އޮފީހަކަށް ހަދާނެކަމަށެވެ. އެކަންކުރާނެ ގޮތެއް އެދުވަހަކު ކިޔައެއް ނުދެމެވެ. އޭރު، އެ ޙުސައިން ޝަމީމް އޮފީހުން ގެއަށް ވަޑައިގަންނަވަނީ ޢާންމު ގޮތެއްގައި ރޭގަނޑު 7 ޖަހާއިރުއެވެ. އަޅުގަނޑުގެ ވާހަކަ އަޑުއަހާފައި އަޅުގަނޑަށް ނިކަން ޖޯކުޖަހައި، "މީމު" ހަދައި އުޅުނުކަމަށް އަޅުގަނޑު ގާތު ފަހުން ވިދާޅުވިއެވެ. އެ ޙުސައިން ޝަމީމްގެ ތުއްޕުޅު ދެ ދަރިކަލުން ހޭލާ ހުންނަ ގަޑިއަކަށް ގެއަށް ވަޑައިގެންނެވޭ ދުވަހަކީ މަދު ދުވަސްތަކެއް ކަމަށްވެއެވެ. އަޅުގަނޑު މަޤާމުން އިސްތިއުފާދިން ދުވަހު އޮތް ޕާޓީގައި އަޅުގަނޑު ގާތު އެ ޙުސައިން ޝަމީމް ވިދާޅުވީ، އެ ދުވަހު އެ ވާހަކަ ޤަބޫލުނުކުރެވުނަސް، ޕީޖީ އޮފީހުގެ މަސައްކަތްތައް ނިންމައި، 2 ގައި ބައިގައި ގެއަށް ގޮސް، ދަރިންނާއެކު ވަގުތު ހޭދަކުރުމުގެ ފުރުޞަތު ލިބުނުކަމީ އެ ޙުސައިން ޝަމީމަށްވެސް ޤަބޫލުކުރަން އޭރު ދަތި، ނަމަވެސް، މިހާރު ފަސޭހަ ކަމެއް ކަމަށެވެ. ފޮޓޯގައި އެ ހުރީ ދެ ޙުސައިން ޝަމީމެވެ.

ކޮންމެއަކަސް، އަޅުގަނޑުގެ އެ ޙަޔާތް މިހިނދަށް ނިމުނީއެވެ. މިހާރު މިއޮތީ ޓުއަރިޒަމް ދާއިރާއެވެ. ނަމަވެސް، އަޅުގަނޑު އަބަދުވެސް އެދެނީ ޕީޖީ އޮފީހަށާއި ދިވެހިރާއްޖޭގެ ޖިނާއީ ޢަދުލުގެ ނިޒާމު އަބަދުމެ ހަރުދަނާވެ ކުރިއަރަމުން ދިއުމެވެ. އިންސާނުން މަސައްކަތްކުރާ މުއައްސަސާތަކެއްކަން ދަނެގެން، އިންސާނުންނަށް އަރާމުކުރާނެ ވަގުތާއި، ޢާއިލާއާއެއްކޮށް ހޭދަކުރާނެ ވަގުތާއި، ކަސްރަތުކުރާނެ ވަގުތު ބޭނުންވާނެކަން ދަނެގެން، އެ ދާއިރާގެ މުއައްސަސާތަކުގެ މަސައްކަތްތައް ބައްޓަންކުރުމެވެ. ކުށުގެ ރެކޯޑު ފޯމުތަކުގައި ސޮއިކުރަނީ އަޅުގަނޑެއް ނޫނެވެ. އެއީ އެހެން ޙުސައިން ޝަމީމެކެވެ. އަޅުގަނޑު ނެތަސް، އަޅުގަނޑުމެން ތަޢާރަފުކުރި މަސައްކަތުގެ ނިޒާމުތައް ހިންގާނެ ޙުސައިން ޝަމީމެކެވެ.